一、公職法律制度
特區政府近年推出多項涉及公職法律制度修訂嘅計劃，但係部分修訂工作唔係“影都無埋”，就係畀人“得個講字”嘅感覺。例如分級調薪、評核改革等，相信由於唔具備條件推行，“然後”就冇咗“然後”。
探討一啲有“然後”嘅：跨職程晉升機制，原意係畀符合條件嘅公務人員，透過參加跨職程培訓考核同晉升開考，向更高職程發展。呢個係好事嚟嘅，但自2017年公開諮詢到依家已經有四年時間，明年施政報告亦都再次提出，會設立跨職程晉升機制嘅具體方案，包括原則、條件、培訓，以及考試嘅規範，但方案需要喺明年第四季先完成，加上之後啟動修法程序，唔少公務人員都想知道究竟幾時先可以正式落實？因為都擔心會唔會又係“得個講字”，“拖下拖下”又一屆政府。
回顧近年涉及公職法律制度嘅修訂工作，除咗2018年《人員通則》，以及今年對職程制度做咗部分修訂，令社會印象最深嘅應該都係招聘制度嘅“改革”，十年間經歷多次大修小改，頻繁程度不知應該講係“持續改善”定係“朝令夕改”。客觀嚟講，依家公職招聘所引申嘅爭議確實比過去少咗，只係唔知係制度已經有所完善，定係特區政府控制公務人員增長，招聘少咗先無事發生。
無論如何，公職法律制度涉及招聘、晉升、評核、培訓、薪酬、職程等等，方方面面都係環環相扣，請問司長，有冇系統性及全面性嘅公職制度改革藍圖？有嘅話可唔可以具體介紹。
另外，明年施政方針提出修改《人員通則》，確立符合實際需要嘅人員調動方式。呢個方向我係認同嘅，但亦都有質疑，都想探討一下。《人員通則》嘅調動方式包括調任、派駐及徵用，但只限確定委任嘅公務員，呢部份嘅公務員佔唔夠4成；而行政任用合同人員如果想橫調到其他部門，就要透過《公共部門勞動合同制度》調職嘅方式，呢種聯繫方式嘅公務人員佔近五成，所以單靠修改《人員通則》就可以充分運用特區政府嘅人力資源，完善橫調機制？我係質疑嘅，係咪都要修改埋12/2015，喺到都想聽下政府嘅解釋。
另外，啱啱議員同事都有講，依家想調任或調職唔係咁容易，起碼要搵到部門收，仲要原部門放人，所以都想了解下《公共部門勞動合同制度》生效六年以來，成功調職嘅數據，唔知當局有無掌握？
二、官員問責
啱啱司長都介紹咗，將會由行政、紀律，以至刑事制度完善官員問責，不斷完善工作係直得支持嘅，但單憑呢三方面係咪就可以建立良好嘅官場承擔文化？我係有保留嘅。但必須強調，官員問責唔係話做錯少少嘢就要落台，更加核心嘅精神係希望透過健全制度，令官員更有擔當同更有承擔。所以唔知除咗頭先介紹戈三方面外，司長仲有冇其他措施可以加強官場承擔文化？
另外，本來講咗今年會起草官員問責嘅法律法規，但公職局喺最近回覆本人書面質詢嘅時候都提到，已經對現行各級官員職權嘅規定，進行咗分析梳理，下一步將制定具體嘅修法方案，按序推進相關法律法規嘅修改。想了解清楚，係咪代表有關工作今年又“跳票”？究竟特區政府有冇明確嘅落實時間表？因為呢個問題除咗社會，就連特區政府都講咗好多年。如果冇明確嘅時間表，好容易“講下一年，講下又一年”。希望喺落實進度方面都可以介紹一下。尤其國家主席習近平亦都多次強調：“有權必有責、有責要擔當、失責必追究。”我諗儘快完善同落實官員問責制度，亦都係公共行政改革嘅重要一環。
三、基層公務員
喺支援基層公務人員方面，明年施政總算見到一個亮點：將經濟補助，延伸適用到，符合條件嘅“公職金制度”離職人員，頭先都有同事提過，高局長亦都答咗稍後會有更多詳細資料。我想探討嘅係，雖然“退休金”同“公職金”是兩種制度，但既然頭先講到嘅經濟補助，可以延伸到符合條件嘅“公職金制度”離職人員，未來係咪有條件透過同一方式，為“符合條件”嘅基層公務人員嘅退休生活提供更多保障？因為呢個都係唔少基層公務人員關心嘅問題，尤其“公職金制度”的基層公務人員。
講到支援基層公務人員，特區政府一直都強調關注，尤其低收入公務員嘅生活狀況。但事實上，政府依家對“基層公務員”都仲未有清晰定義，究竟是以薪俸點抑或人員組別嚟劃分，例如橫向職程嘅勤雜人員，第一職階110點、第十職階240點，如果按啱先局長講到，對220點或以下嘅經濟補助措施呢條線去界定嘅話，咁第一職階勤雜人員就算係基層？第十職階勤雜人員就唔係？因為如果連定義都未有，仲點講幫扶“基層公務員”？都希望同政府探討一下。
四、電子政務（G2E）
近年政府喺便民、便商，以及公共部門之間嘅電子政務工作都有唔少舉措，呢啲都係客觀事實。但有一個重要持份者，我認為仲係做得唔夠嘅，就是對公務人員嘅電子政務工作方面。雖然公職局推出咗公務人員管理及服務平台，但收到唔少反映，系統客製化程度唔夠、兼顧唔到唔同部門嘅運作特性，導致影響使用，公職局有冇掌握長期使用相關系統嘅數據？對於未有普及使用嘅部門同人員，又有冇主動了解原因係乜？有咩改善措施？呢方面都想了解下。
五、公務人員非辦公時間工作的問題
分屬唔同部門嘅公務人員反映，經常喺非辦公時間，甚至晚上11、12點，仲會收到上級下達嘅工作指令，或要求即時答覆非緊急嘅工作內容。上級作為評核人，有時真係無辦法唔覆，長期係咁又會對休息同工作績效做成影響。
司長回應：
◆職程改革方向是減少特別職程，簡化公職職程的構成，以便於人員管理及內部流動。
◆官員問責將循行政授權、領導主管專有紀律制度及刑事制度三方面改革，明年會公開諮詢社會意見。
◆若基層人員申領經濟補助後仍有生活困難，還可再申請每月生活補助。當局正就經濟補助延伸至“公職金制度”離職人員的資格標準進行研究。
